حصل الأسبوع ده تغيير كبير فى مجريات بعض الأحداث

بداية من ترقية أخويا فى شغله

مروراً بإفتتاح صيدلية أختى

وإنتهاءً بمعرفتى إنى نجحت

أينعم معرفتش تقديراتى لسه بس على الأقل إرتحت من هم المادة اللى كنت خايف منها

***********************

ولأنى مش مؤمن بالصدف فالترتيب ده كان له من وجهة نظرى دلالة واحدة

وهى إن الأمور ممكن تتصلح للأحسن فى الوقت اللى ممكن نفكر فيه إن ده مستحيل

وإن الإنسان لو تحكم فى أفكاره حيتحكم فى تأثير المواقف عليه

وده ممكن بشكل من الأشكال يحدد مصير الإنسان

وإن مستقبل الإنسان بيتشكل من خلال رؤيتة للحاضر والظروف

وبالتالى الإنسان ممكن يتحكم فى حياته ومستقبله

*********************

أكيد كنت محتاج للإحساس ده فى وقت زى ده

خصوصاً إنى تحديت نفسى إنهاردة وسحبت عينات دم فى المستشفى رغم قلقى وخوفى من الموضوع ده

أينعم المرضى كانوا بيبصولى بصات غريبة زى اللى عايزين يخنقونى بس علشان أتعلم لازم يكون فيه ضحاية

المهم نتعلم بسرعة علشان عدد الضحايا ميكنش كتير

********************************

ودلوقتى مستنى يوم 29 ده بفارغ الصبر لأنى ولأول مرة حشوف ابن أخويا وجهاً لوجه

أينعم حلمت بيه بس الحلم مش كفاية .. لازم يتحقق

لازم

وتقريباً جه الوقت اللى لازم أبص فيه للحياة نظرة من التفاؤل المختلط بالتحدى

وربنا يوفقنى