Mesh 3aref...  

Wednesday, May 28, 2008

مش عارف إزاى ده ممكن يكون حصل

بس إمبارح حليت حلول زى الزفت لدرجة إنى لما حسبت لنفسى الدرجات لقيتنى مش حنجح

والأغرب إن الإمتحان مكنش معقد بس كان فيه خدع ومش متخيل إزاى الدكتور يجيب حالات مرضية عليها 60 درجة من أصل 100 برغم إنه مشرحش ولا حالة مرضية واحدة فى المحاضرات

وكله كوم والجزء بتاع

HyperCortisolism

كوم تانى

لأنى كنت مذاكرة كويس وفاهمة وأنا واثق إن ربنا عمى عينى عن الإجابة وأكيد ده لسبب أنا معرفوش

بس انا دلوقتى حطيت نفسى فى الحسبة الغلط وعمال أفكر إيه اللى ممكن يحصل لو طلعت بمادة فى آخر ترم ليا فى الكلية

بس دى أكيد حتكون نهاية حاجات كتير

حاجات لسه مبدأتش أصلاً

طول الوقت وانا واثق إن ربنا دايمن بيريد لى الأفضل وده بيبان لى فى حاجات كتير

بس المره ده مش عارف أفكر

ومش عارف ممكن اعمل إيه لو اتكتب فى شهادة التخرج إنى كنت دور تانى

أنا أكيد أكيد قصرت فى المذاكره وفى الحضور

بس برضه نتيجة الترم الأول سببت لى إكتثاب

والغريب إنى لحد اللحظة دى مش عارف أنسى وأكمل حياتى وأركز

ممكن يكون أتكتب عليا الفشل ؟

ولا ممكن يكون ده عقاب من ربنا على حاجه أنا عملتها ؟

ولا هى الكلية مش مكفيها اللى عملته فيا فى أربع سنين

ما أول سبع أيام فى الأسبوع

وتيجى يوم الجمعة بعد الصلاة

مروراً بيومين عندى فيهم من 8 صباحاً ل 8 مساءاً كل أسبوع

وكتور يحلف إن محدش حيجيب فى المادة أكتر من جيد

ودكتور تانى شايف إننا تافهين ومالناش لازمة والمفروض ننتحر

ومحاضرة توصل ل 5 ساعات

ومعاد إمتحان آخر السنة اللى يتغير قبل الإمتحان بيوم واحد

والمادة اللى معاد إمتحانها حسب هلال الشهر الهجرى ودى مش دعابة لأنها حصلت فعلاً عندنا

ده غير التعب والزهق والإرهاق على مدار أربع سنين

وكل دى مجرد أمثلة لحاجات حصلت لى

وبعد كل ده الكلية مش مكفيها وعايزه تنهيها معايا بمادة

دلوقتى ودلوقتى بس إفتكرت لما أخويا كان واقف ضدى ومش عايزنى أدخل الكلية

افتكرت لما كنت ضد إرادة كل اللى حواليا ورحت سحبت الملف وحولت لعلوم

إفتركت كلمة والدى لما قاللى إنت إخترتها يبقى تكمل فيها ومش من حقك حتى تشتكى

وخلال أربع سنين وأنا بتحمل نتيجة إختيارى ومش بشتكى

بس تقريباً مبقتش قادر والإنفجار على وشك الحدوث

ناقص كمان مادة واحدة ومش بذاكرها ومش عارف حعمل إيه

الشىء الوحيد اللى بقيت عارفه ومتأكد منه هو إنى خلاص

خلاص

خلاص

خلاص

خلاص

Fed Up

by romantic rock